দ্য এ টীম

(ইংৰাজ গায়ক, গীতিকাৰ, গীটাৰবাদক, সংগীত নিৰ্মাতা Ed Sheeran-ৰ The A Team শীৰ্ষক গীতৰ ভাবানুবাদ)

বিৱৰ্ণ ওঁঠ, শেঁতা পৰা মুখ

বৰফৰ চেঁ‌চা খামোচত তাই উশাহ লয়

জ্বলি থকা পেটত টেঙেচী সোৱাদ

পৰিশোধ নকৰা ভাড়াৰ গন্তিত শেষ হয় দিন

শেলুৱৈ বাটেৰে অচিনাকি পুৰুষৰ গোন্ধত খুপি খুপি দীঘলীয়া ৰাতিবোৰ নামে

জীৱনৰ ওঠৰটা বসন্ত গৰকাৰ পৰাই তাই হেনো

দিবাস্বপ্নত মজি থকা নিচাখোৰৰ ৰাজ্যৰ প্ৰথম শ্ৰেণীৰ নাগৰিক

একাঁজলি পানীত এতিয়া যেন ডুবিব ধৰে তাইৰ মুখৰ ছবি

নষ্টপ্ৰায় পেষ্ট্ৰী এটাৰ দৰে লাহে লাহে।

কোনে বা চিঞৰি উঠে নেপথ্যত ---

"The worst things in life come free to us…"

জীৱনৰ জপনা খুলি নিবিচৰাবোৰ বৰ সহজকৈ আহে এনেকৈয়ে

কিয়নো তাই যে ঈশ্বৰৰ দেশৰ মানুহ!

নাই নাই, বাহিৰৰ চহৰত তাই আজি নেমেলে ডেউকা

ধোঁৱা আৰু নিচাৰ কাঁচৰ নলীৰে  তাইৰ মাতৃভূমিলৈ উভটনি খোজৰ সপোন

অথবা তৃতীয় পুৰুষৰ সৈতে ভালপোৱাৰ দৰ-দাম

পাবা জানো, শীতৰ ৰাতি বাহিৰৰ আন্ধাৰত সৰগৰ দূত?

নিৰ্জীৱ কোঠা একোটোত সিঁচৰতি খুচুৰা নোটৰ মাজত

ভাগৰুৱা চকুৰে তাইৰ বেশ্যাৰ বিলাস

টাপলি মৰা পোছাকেৰে বাৰে বাৰে সাঁতুৰিব খুজি

তাই উপঙি থাকে আয়াসত

শীতৰ ৰাতি বৰফৰ খামোচত কঁপি মৰে সৰগৰ দূত।

বন্ধ চকুৰ ৰঙীণ আশাত বন্দী আমিও মানুহ

পিছে জীৱনৰ জপনা খুলি নিবিচৰাবোৰ বৰ সহজকৈ আহে

কিয়নো আমিও ঈশ্বৰৰ দেশৰে মানুহ

বাহিৰত এতিয়া মাথো বৰফ আৰু কুঁৱলীৰ ভিৰ,

বাহিৰত এতিয়া মাথো বৰফ আৰু কুঁৱলীৰ ভিৰ।