বিবিধ ১

এই যে সন্ধ্যা নামিলেই তোমাৰ ছবি এখন উলিয়াই লৈছো, তুমি সিদিনা কোৱা লেথাৰি নিচিগা কথাবোৰ ভাবি অকলে অকলে হাঁ‌হিছো এয়াও একোটা অভ্যাস। চোলাধৰাৰ ৰাস্তাৰে জেপত হাত ভৰাই অকলশৰে খোজকাঢ়ি ফুৰাৰ দৰে ভাললগা অভ্যাস। মোৰ চোলাৰ জেপত ৰঙা গোলাপ দেখি প্ৰিয়াই আটাইকে এটা কাহিনী শুনাইছে। গৌতমে প্ৰতিদিন মোৰ ফোনত তোমাৰ চেহেৰা বিচাৰি হাবাথুৰি খাইছে। এজাক মানুহে বাৰে বাৰে তোমাৰ ঠিকনা সুধি আমনি কৰিছে। সচাঁ‌-মিছা অলেখ কথাৰ ভিৰত মোৰ প্ৰিয় চহৰত মই বদনাম হৈ গৈছো। তোমাক লৈ যে ভাড়াঘৰৰ চুবুৰীত কি এক কৌতূহল তাকে লৈ মই আমোদ লোৱাটোও এটা অভ্যাস। ভাললগা অভ্যাস।